Agenda di Maneho 2010

2010: Aña di transicion

Na fin di 2010 e acuerdonan pa logra un miho structura di gobernacion pa Antia Hulandes mester ta cla. Corsou, Sint Maarten, Boneiro, Sint Eustatius y Saba lo pone e pasonan final rumbo na nan status nobo como pais of como un entidad publico denter di e organisacion estatal di Reino Hulandes.  E proceso estatal no ta un obhetivo riba su mes: cu eliminacion di pais Antia Hulandes un capa administrativo lo desaparece. Esaki lo permiti Gobierno pa actua na un forma mas efectivo ora di duna servicio publico y ora di garantisa miho proteccion huridico pa su poblacion. Na 2009 ta pone tur atencion riba ehecucion di e acuerdonan haci. Na 2010 lo sigui cu e proceso aki pa e futuro paisnan Corsou y Sint Maarten den transcurso di e aña actual lo pa duna contenido na e status di pais, manera Aruba a logra na 1986. Tambe e futuro entidadnan publico Saba, Sint Eustatius y Boneiro lo ta cla den transcurso di 2010 pa duna contenido na nan status nobo.

Eliminacion di Pais Antia Hulandes, fundacion di e entidadnan publico y creacion di e paisnan nobo ta resultado di un proceso largo, intensivo y conhunto. Tambe den e ultimo fase di e proceso estatal aki, cu ta dirigi principalmente na preparacion di e institucionnan, e esfuerso conhunto ta hopi crucial. E proceso di eliminacion y creacion di entidadnan den e fase aki ta fuertemente interrelaciona. Di e manera ya na 2009 riba ruta pa e transición aki hopi tarea di Pais Antia Hulandes, lo wordo transferi pa e paisnan nobo y Hulanda. Na 2010 e transferencia gradual di tareanan lo sigui aumenta of lo cuminsa cu nan. E progresonan desea den area social, economico y administrativo y cu esaki e progreso den bienestar di poblacion cada bes lo bira mas visibel.

Sint Maarten y Corsou

Sint Maarten y Corsou  ta tumando tur preparacion necesario pa por cumpli cu e criterionan pa bira un pais. Pa e proceso aki nan mes ta responsabel. Dia 15 di December 2008 a tene un conferencia di mesa rondo, caminda a evalua e leynan organico y areglonan estatal di e futuro paisnan Corsou y Sint Maarten. A yega tambe na un acuerdo conhunto tocante e ley di consenso di reino. Na 2009 ta presenta e leynan di reino na parlamento pa nan por tuma un decision; nan tratamento lo sigui parcialmente den curso di 2010. Aprobacion parlamentario di e normanan pa e futuro paisnan Corsou y Sint Maarten ta responsabilidad di e islanan mes.

Na cuminsamento di e proceso estatal tambe a acorda cu promer cu e status nobo bira vigente lo tuma lugar un prueba institucional. E prueba aki mester demostra si e entidadnan ta cumpli cu e criterionan di e proceso estatal cu a acorda na 2006. Nan mester por demostra, no unicamente riba papel, pero tambe den practica, cu nan ta cla pa asumi nan responsabilidadnan. E prueba extenso y principalmente institucional aki a cuminsa na 2009 y lo resulta conforme cu a wordo acorda den un Conferencia di Mesa Rondo final cu ta planifica pa tuma luga na 2010.

Boneiro, Sint Eustatius y Saba

Conhuntamente cu parlamento ta trata e asunto relaciona cu e leynan necesario pa entidadnan publico Boneiro, Saba y Sint Eustatius, implementacion di e legislacion pa e isla y nan departamentonan tambe ta wordo prepara pa e islananan asumi nan responsabilidadnan, pa mas tarda riba e fecha di transicion, pero den hopi caso nan lo ta cla promer cu e fecha ey. E preparacion aki ta tuma lugar principalmente riba y hunto cu e islanan mes.  Hopi departamento a nombra pa e tarea aki administradornan (kwartiermakers), cu ta haci nan trabao for di un di e Centro di Servicio Regional situa na Boneiro, Saba of Sint Eustatius. Tambe a nombra na fin di 2008 un comisario pa e islanan BES cu lo guia y stimula cooperacion entre gobernacion di e isla y nan departamentonan.

Saneamento di debe

E saneamento di debe cu a cuminsa na 2009 mester aporta un contribucion importante pa logra un posición di salida financiero saludabel pa e islanan. E saneamento di debe aki tambe lo continua na 2010, basta cu e entidadnan sigui cumpli cu e condicionnan cu a propone. E condicion mas importante ta, cooperacion constante cu e Colegio di Supervision Financiero (Cft) y den e caso di Pais Antia Hulandes y Corsou esaki lo ta pa obtene un recomendacion positivo di Cft tocante e presupuestonan. Tambe ta inclui cu mester cumpli cu e acuerdonan di Cft cu ta necesario pa logra un recomendacion positivo. P’esey, pa logra un posición di salida financiero sano, ta necesario pa conta tantu cu un debe cu por paga na principiodi e relacionnan estatal nobo, como un administracion di presupuesto constante cu ta sano y un administracion financiero mehora. E ultimo aki ta importante pa evita cu e entidadnan nobo ta slip bay back den un peso di debe cu no por controla.

Forsa Gubernamental y Mantencion di Ley

E capacidad pa goberna di e islanan tambe ta un punto di atencion importante na 2010. Al fin y al cabo, e obhetivo mas importante di un proceso estatal ta pa garantisa pueblo un bon gobierno. Pa medio di e programa di cooperacion “Fortalecemento Institucional y Forsa Gubernamental”  ta apoya tur e islanan ora nan mester fortalece nan aparato gubernamental y administrativo riba rumbo pa nan status nobo. E trayectonan di mehoramento aki lo sigui te na aña 2010. Cu e meta aki ta sigui coopera tambe cu Asociacion di Municipalidadnan di Hulanda. Ademas Hulanda a percura na 2009 pa asistencia di e personal di apoyo na Gabinete di e Gezaghebbernan. Esaki lo continua na 2010.

Cooperacion y asistencia riba tereno di husticia y aplicacion di leynan lo wordo completa pa medio di e leynan di consenso di reino y otro acuerdonan di cooperacion. Den futuro e asistencia aki lo no tuma lugar riba base di maneho di cooperacion pero riba base di e funcion di garantia. E dimension di e islanan tambe ta haci cu cooperacion ta keda necesario despues di e transicion pa asina garantisa suficiente calidad y cantidad. Wardacosta di Antia Hulandes y Aruba ta un bon ehempel di esaki. Na 2010, cu apoyo di Hulanda, lo implementa e ley di consenso pa polis y e mehoracionnan necesario pa e organisacionnan policial. Un bon implementacion di tur e leynan di consenso di Reino ta hopi importante. Pa logra un trayecto di calidad lo duna apoyo durante un periodo di mas of menos tres aña na e tres futuro Cuerponan di Polis y na e Facilidadnan Comun pa Polis. Den bista di implementacion di e Ley di Reino pa Polis lo mester yega na acuerdonan mas detaya entre Gobierno di Hulanda y Antia Hulandes y e Colegionan Ehecutivo di Corsou y Sint Maarten tocante e transferencia real di e tareanan cu actualmente e ekipo di cooperacion di recherche (RST) ta encarga cune, pa e respectivo cuerponan. Aunke na 2010 no a pone disponibel e recursonan adicional pa e Plan di Seguridad Antia Hulandes, e finalisacion di e trayectonan den desaroyo lo exigi nan debido atencion. Tambe lo considera na 2010 con por continua cu e aporte exitoso di Koninklijke Marechaussee.

Aruba

Na 2010 ta spera di completa e investigacion tocante estado di gobernacion na Aruba. Basa riba e resultadonan di e investigacion lo husga si tin motibo pa tuma medidanan mas detaya y riba cua nivel mester tuma e medidanan aki. Esaki no ta kita afo cu mester sigui mehora cu hopi forsa e cadena di stranhero y Cuerpo Policial di Aruba. E responsabilidad mas importante pa haci esaki mester bin for di Aruba mes. Financiamento pa e asunto aki lo bin for di e medionan cu ta resta den e Fondo di Desaroyo Aruba. Na 2009 Hulanda a deposita su ultimo contribucion den e Fondo di Desaroyo Aruba (FDA). Mescos cu na e otro islanan, Aruba lo no laga di sinti e  efectonan di e crisis financiero. E hecho cu Aruba tin su Finansa Publico basta bon na ordo ta duna e speransa cu Aruba lo soporta e crisis basta bon.

Vision riba e futuro di Reino

Pa termina; e aña 2010 lo caracterisa futuro di Reino. E actual relacionnan estatal ta forma un motibo logico pa contempla e futuro aki. Cua ta e consecuencia di e desaroyonan actual pa futuro y kico nan ta nifica pa establecemento di e relacionnan y e relacionnan actual den Reino? E structura estatal nobo lo afecta e manera cu ta duna contenido na e funcion di garantia y kico esaki ta nifica den practica? Kico e structura nobo lo nifica pa e forma cu e partnernan ta trata otro den Reino? E desaroyonan actual lo cambia e forma con e ciudadanonan den Reino ta mira otro? Ciudadano di e parti Europeo y e parti Caribense ta comparti e mesun ambicionnan pa loke ta trata Reino? Tocante esaki y otro preguntanan lo organisa algun simposio. Resultado di e serie di simposio aki lo aporta un contribucion importante na e “Vision riba Futuro di Reino” cu lo formula.