Lo no otorga documento di biahe den caso di persecucion penal na otro pais

Conseho di Ministro di Reino a bay di acuerdo cu un proposicion pa modificacion di e Ley tocante Paspoort a peticion di Secretario di Estado Bijleveld. E modificacion aki ta haci posibel pa nenga of anula un documento di biahe, den caso cu ta existi e sospecho funda cu e persona en cuestion lo huy pa persecucion penal of ehecucion di castigo na un otro pais cu no ta Hulanda, Antia Hulandes of Aruba. Lo mester trata si di echo cu ta resulta den un delito pa cual, segun derecho Hulandes, Antiano Hulandes of Arubano, por impone un castigo di privacion di libertad di (maximal) un aña of mas largo.

E motibo di e proposicion di ley ta otorgamento di documento di biahe door di Consulado General Hulandes na Rio de Janeiro na aña 2004 na dos Hulandes cu nan tabata persigui na Brasil pa motibo di produccion y propagacion di material pornografico di mucha. E autoridadnan local a retene nan paspoortnan. E dos Hulandesnan a haya chens di bandona Brasil cu e documentonan di biahe otorga door di e Consulado y bula pipa pa persecucion penal y ehecucion di castigo. E cuestion aki a causa conmocion tanto na Brasil como na Hulanda.

Conseho di Ministro a bay di acuerdo pa manda e proposicion di ley pa asesoria na Conseho Consultativo di Reino. Tanto e texto di e proposicion di ley como e conseho di Conseho Consultativo di Reino lo bira publico na momento cu entrega nan na Parlamento Hulandes.