Resultado di investigacion di buelo Schiphol - Detroit

A prepara e atentado fracasa riba buelo di pasahero NW253 Amsterdam-Detroit basta profesionalmente, pero a ehecut’e amateuristicamente. Esey ta resultado di e investigacion provisional di e autoridadnan Hulandes.

E explosivo cu a uza no ta simpel ni sin riesgo pa trah’e bo mes. Banda di esey e forma di traha y e explosivo ta concorda cu atentadonan anterior. Ademas ta resulta di e investigacion cu e sospechoso Omar al-F tabatin un visa vigente pa biaha pa Merca. Prome cu e buelo e lista di pasahero entrega, pa Merca no a duna motibo pa pidi medida extra. Durante su transito na Schiphol e sospechoso no a sali for di e zona di duana y protocolariamente nan a somet’e den e zona di duana di nobo na un control cu detector di metal. Di e control ey no a resulta ningun particularidad.

Entretanto Ministro di Husticia -den consulta estrecho cu e autoridadnan Mericano- a dicidi inmediatamente pa pone e bodyscanner den funcion den e proceduranan di seguridad na Schiphol pa buelonan pa Merca.
Esey Ministro Ter Horst (Ministro di Husticia ad interim den caso di ausencia di Ministro Hirsch Ballin) ta skirbi den un carta na Tweede Kamer tocante e prome resultadonan di e investigacionnan cu a efectua na Hulanda despues di e atentado riba e buelo di dia 25 di december di Amsterdam Airport Schiphol pa Detroit (Merca).

E sospechoso cu dia 25 di december a purba laga un avion cay cu explosivo a sali dia 24 di december 2009 for di Lagos, Nigeria, cu buelo KL 0588 pa Schiphol. E buelo ey a yega dia 25 di december 2009 pa 5:37 ora Hulandes (CET). E dia ey el a sali, previo autorisacion di e autoridadnan Mericano, for di Schiphol pa 8:55 (CET) cu buelo NW 253 pa Detroit (Merca). Pa 6:40 e subimento na bordo a cuminsa. E ruta di transito aki ta usual pa Nigerianonan cu ta bula pa Merca. E sospechoso tabatin un ticket di ida y buelta den su poder, cu el a cumpra na Accra (Ghana).

Tur compania aereo cu ta bula di, pa of via Merca ta obliga di entrega na e autoridadnan Mericano e datonan di tur pasahero y di e tripulacion prome cu salida di e buelo. E autoridadnan Mericano den e caso aki a duna e compania di aviacion autorisacion pa transporta e sospechoso, sin pidi e momento ey medida di seguridad extra. Durante e investigacion di seguridad no a surgi ningun asunto sospechoso, cu a duna motibo pa un clasificacion di pasahero riesgoso. E tabata den poder di un visa balido pa Merca. E sospechoso a pasa e tempo di transito usual (algun ora) den e lounge internacional di e aeropuerto. E sospechoso no tabata conoci pa e autoridadnan Hulandes.

A base di e informacion disponibel na e momentonan aki por informa cu e explosivo improvisa tabata riba curpa di e sospechoso, na un sitio tal cu no por a ripar’e. E ingrediente principal di e explosivo tabata 80 gram di tetranitrato di pentaeritritol (PETN, tambe yama ‘pentrito’). Esaki ta un explosivo convencional masha fuerte cu no ta simpel ni sin riesgo pa prepar’e bo mes. Tambe a haya resto di un spuit di inyeccion, cu tabata contene substancia kimico likido. Esaki probablemente lo mester a funciona como mecanismo di detonacion. Prome cu e incidente e sospechoso lo a keda basta tempo den e w.c. di e avion, talbes pa hinca e elementonan los den otro pa forma un ‘Aparato Explosivo Improvisa’ (IED).

E forma di traha den e asunto aki ta mustra - a pesar di e fracaso di e atentado - di ta un forma di traha basta profesional, cu por compara cu algun intento anterior di atentado contra aviacion civil. Ehempelnan anterior ta e asina yama ‘shoe bomber’, cu na 2001 na bordo di un avion a purba laga un explosivo improvisa, tambe pentrito den su sapato cu TATP como detonado, explota y e atentadonan frustra riba buelo transatlantico na 2006, cu explosivo likido cu lo mester a pasa como contrabanda den boter di refresco den e ekipahe di man. E ehempel mas reciente di un atentado similar ta esun riba un prins Saudita na augustus 2009. Den e atentado ey esun cu a comet’e a muri. E prins a resulta levemente herida den e atentado.

Directamente despues di e incidente Polis Militar Real (KMAr) a start cu un investigacion di loke por a pasa. KMAr, asisti pa Recherche Nacional (NR), a cuminsa, bou di direccion di Ministerio Publico, un investigacion di e posibel delitonan cu a comete den teritorio Hulandes (incluyendo e avion di KLM cu a transporta e sospechoso di Lagos pa Schiphol). Ta trata di participacion den un organisacion terorista y cometemento di actividadnan di preparacion di un delito terorista, door di bula cu un avion Hulandes pa Schiphol, keda na e aeropuerto di Schiphol y cambia di avion pa comete e atentado den e buelo di Schiphol pa Detroit. Banda di esey e investigacion ta dirigi tambe riba e marcha real di asunto rond di e proceduranan di seguridad na e aeropuerto. E investigacion ta dirigi -tambe a base di dato di buelo y imagen di camara- riba e actividadnan ey y e contactonan eventual di e sospechoso durante e periodo di transito na Schiphol, y durante e buelo previo den un aparato di KLM. Na unda ta necesario ta entrega peticion pa asistencia huridico entre Hulanda y Merca di un pais pa otro.

Mester mira e incidente na Detroit los di e bahamento di escala di e Imagen di Menasa di Terorismo na Hulanda pa “limita” anteriormente e luna aki. E sucedido no tin consecuencia pa e nivel aki tampoco. E bahamento di escala no tabatin consecuencia directo pa medida di seguridad concreto, manera por ehempel na Schiphol. E incidente di dia 25 di december 2009 ta matisa e posibilidad di un atentado den e sector di Aeropuerto poco mas y ta hustifica anto e nivel di alerta actual di menasa leve pa e sector ey, como tambe e medidanan di seguridad resultante di esey. E medidanan extra cu a tuma na Schiphol pa motibo di e delaster incidente ta, por lo tanto, solamente relaciona cu e buelonan pa Merca of cu ta pasa riba Merca.

Den consulta estrecho cu e autoridadnan Mericano Ministro di Husticia a dicidi inmediatamente pa pone e security scanner den funcion. Esaki ta aumenta e posibilidad di descubri sorto di cosnan asina considerablemente. Banda di esey ta boga den contexto Europeo, riba peticion di Hulanda, pa pone e security scan structuralmente den funcion.