Preguntanan hopi frecuente

1. Na unda mi por haya yudansa pa mi empresa chikito?  
2. Antiya tambe ta introduci Euro? 
3. Boso por duna placa pa mi proyecto? 
4. Pakico Hulanda no ta sostene turismo den Antiya?  
5. Nos mester economisa di FMI y ainda nos no ta haya placa extra!  
6. Hulanda a duna hopi placa extra na aña 2000. Kico a pasa cu e placa ei? 
7. Hulanda ta asina rico; wel, duna pober Antiya placa extra! 8. Pakico Hulanda no ta exonera Antiya di su debe? 
9. Si Hulanda no duna placa extra, anto esnan mas pober na Antiya ta e victimanan! 
10.  Pakico Hulanda no ta percura pa mas invershon na Curacao?

[bw]1. Na unda mi por haya yudansa pa mi empresa chikito?
Tin reglamento Hulandes accesibel pa empresa Antiyano. Pronto lo habri mas reglamento. Pa informashon bo por acudi na boso Departamento di Asunto Economico, boso Servicio di Asunto Economico insular, Camara di Comercio of Economic Partnership.

[bw]2. Antiya tambe ta introduci Euro?
No. Antiya ta mantene florin Antiyano y Aruba ta mantene florin Arubano. E monedanan aki ta mara na dollar Mericano. Euro ta yega hopi cerca si: na Marigot e habitantenan di Sint Maarten lo por paga cu euro for di januari. Pero cu dollar tambe lo bo por sigui haci negoshi na Marigot.

[bw]3. Boso por duna placa pa mi proyecto?
Un bon proyecto semper ta bonbini. Hulanda ta duna preferiblemente placa pa proyecto den enseñansa, administrashon publico, economia, medio ambiente y infrastructura. Gobierno Antiyano ta stipula cua proyecto ta manda Hulanda. Pa mas informashon bo por acudi na Departamento di Cooperashon pa Desaroyo na Willemstad.

[bw]4. Pakico Hulanda no ta sostene turismo den Antiya?
Hulanda ta dispuesto pa sostene proyecto riba tereno di turismo. Te hasta tin di e proyectonan ei andando caba. Naturalmente Hulanda ta duna placa solamente na bon proyecto. Antiya mes tambe por haci hopi pa stimula turismo. Banco Mundial a haci estudio riba esaki pa Antiya. Tambe FMI a bisa cos util tocante esei.

[bw]5. Nos mester economisa di FMI y ainda nos no ta haya placa extra!
Na aña 2000 Antiya a haya placa extra di Hulanda, pasobra e tempo ei tabata cumpli cu e palabrashonnan haci entre FMI y Antiya. Ta trata di mas di 150 miyon florin Antiyano cu a pone riba e placa Hulandes cu cada aña ta inverti na Antiya na programa. Na maart 2001 FMI y Antiya a bolbe haci palabrashon. Si Antiya cumpli cu e palabrashonnan ei, anto Hulanda lo bolbe duna placa. FMI lo duna conseho riba cuanto placa y ki dia Antiya lo haye.

[bw]6. Hulanda a duna hopi placa extra na aña 2000. Kico a pasa cu e placa ei?
A duna placa extra na gobierno Antiyano. Esaki a uza e placa ei pa paga cos cu ne. E propio entrada di gobierno Antiyano tabata, en realidad, mucho chikito pa paga tur e gastonan. Hulanda no a bisa den kico mester a inverti e placa. Ke men cu Gobierno Antiyano por a dicidi totalmente e mes kico e lo a haci cu e placa. E unico condishon tabata cu Antiya lo a ehecuta e palabrashonann cu Antiya mes a haci cu FMI. Na september y october 2000 Antiya, emberdad, a ehecuta e palabrashonnan ei y pesei Hulanda a duna e placa e ora ei.

[bw]7. Hulanda ta asina rico; wel, duna pober Antiya placa extra!
Hulanda lo yuda Antiya, ora Antiya yuda su mes. Hulanda ta duna masha hopi placa caba. Djis duna mas placa Hulandes so no ta yuda na nada. E ta yuda solamente ora Antiya mes tambe anda cautelosamente cu placa. Bo mester ta sigur cu gobierno Antiyano mes ta anda cautelosamente cu placa, prome cu duna placa extra. Ta placa di e pagado di impuesto Hulandes. Kier men cu mester inverti e placa ei utilmente. Antiya no ta un pais pober. Entrada pa persona ta mas di dies mil dollar promedio. Mira den e ambito mundial, Antiya ta pertenece na e paisnan rico. Tin region den Europa cu ta mas pober cu Antiya.

[bw]8. Pakico Hulanda no ta exonera Antiya di su debe?
Gobierno Antiyano tin custumber di no paga su debenan na tempo. No solamente su debe cu Hulanda, sino otro debe tambe. Empresanan y ciudadanonan Antiyano ta haya masha molester di esei. Dor di esei nan ta cai den problema financiero. Ademas gobierno Antiyano ta duna un mal ehempel na su ciudadanonan y empresanan. Exonera nan di e debe cu Hulanda no ta yuda na nada. Hulanda ta duna anualmente hopi biaha mas placa na Antiya cu Antiya ta paga na interes na Hulanda. Masha aña Antiya no a paga amortisashon mas, mientras cu e mester a haci esei. Exonera nan di e debe lo ta un recompensa pa un actitud di pago incorecto. Y ta net cu e actitud ei mester kibra na Antiya.

[bw]9. Si Hulanda no duna placa extra, anto esnan mas pober na Antiya ta e victimanan!
Gobierno Antiyano ta responsabel pa maneho, ke men tambe pa repartishon di entrada. Hulanda ta yuda esnan mas pober pa medio di un programa social. Aña pasa a pone pa esei 20 miyon extra mas. Maneho Antiyano no mester dal esnan mas pober en absoluto. Si di awo padilanti por importa cierto producto di otro pais, manera Venezuela, sin cu Gobierno Antiyano kier mira placa prome, anto e ciudadano Antiyano lo mester paga menos pa e productonan ei.

Gobierno Antiyano por scohe pa scrap den gasto deducibel di impuesto cu aworaki ta beneficia principalmente e Antiyanonan mas rico. Pero esei ta algo cu Parlamento Antiyano mes mester dicidi. Otro cos: pakico e ciudadano mester paga interes asina halto pa su debenan? Pakico banco no ta mas barata? Aki ta trata di hopi placa. Mas competencia lo por yuda. Cu un palabra masha nechi FMI ta yama esaki: flexibilisashon di mercado di capital.

[bw]10. Pakico Hulanda no ta percura pa mas inversion na Curacao?
Invershon ta tarea di empresa. Hulanda no por bisa e empresanan kico pa haci. Esei ta nan mes ta dicidi. Nan ta wak si na un pais nan por haci bon negoshi. Si gobierno ta goberna bon. Si e trahadonan merece nan salario. Si nan por haya personal bon capacita. Si telefonia ta bon y si awa of coriente no ta cai afo frecuentemente y si tin bon comunicashon via internet.Y si tur e cosnan ei no ta costa mucho placa. Si nan por haya material bon y barata of si nan por trece nan for di exterior, pasobra ta mas barata. Esta, cu nan no mester paga mucho placa na frontera si nan mester di material.   

Un hende cu kier construi un hotel lo wak si tambe diadomingo y anochi por haya personal pagabel y bon. Pasobra e turista tambe kier sali bai come of bai bar di un hotel riba diadomingo y den oranan di anochi. Y e invershonista ta wak tambe si tin un bon sistema huridico y un gobierno confiabel. Riba hopi di e puntonan aki Antiya ta score hopi bon te excelente.

Riba otro punto tin espacio pa drecha cos. Bo mes sa kico ta e cosnan cu sa molostia bo como ciudadano Antiyano. Cos cu bo ta haya caro. Of cu bo no ta haya bon. Of cu no ta funciona debidamente. Of cu bo no por haya cierto dia of cierto momento. Un invershonista hopi biaha ta paga tino riba e mesun cosnan ei cu abo ta paga tino riba nan. Y e invershonista no mester bin Antiya of keda na Antiya. E por bai cualke otro caminda tambe cu su invershon.

Antiya mester bira asina atractivo cu invershonista lo para den rij pa bin. No literalmente, naturalmente, pasobra invershonista no gusta para oranan largo dilanti di yen di loket tampoco. Invershonista kier hiba hende cu nan tambe. Pasobra di cierto specialista experto no tin suficiente riba cada isla. E hendenan ei mester por establece nan mes y nan mester por traha tambe. Banda di esei invershonista, naturalmente, ta tuma Antiyano den servicio tambe. Pa trece un stranhero ta hopi mas caro, e mester transporta tur su pertenencianan etc. y tur esei ta costa placa tambe, pues, un invershonista ta prefera tuma un Antiyano den servicio cu por haci e mesun cos.                                                    

Hulanda ta yuda na diferente forma. Via enseñansa, pa e invershonistanan haya un poblashon bon capacita. Via e sistema huridico, pa e invershonistanan por confia riba un bon administrashon di husticia. Via yudansa na gobierno Antiyano, pa e invershonistanan haya un bon gobernashon. Hulanda ta yuda tambe cu caminda, brug, haf y aeropuerto. Pasobra bon conecshon tambe ta di importancia pa invershonista. Pero Antiya tambe por haci hopi e mes pa atrae invershonista. Pesei Hulanda ta paga e consehonan cu organisashonnan internashonal renombra ta duna Antiya riba e tereno ei.