Hulanda estado constitucional

• Monarkia constitucional y democracia parlamentario
• E Prome y Segundo Camara (Eerste en Tweede Kamer)
• Ministerionan

[bw]Reino constitucional y Democracia parlamentario

Desde 1848 Hulanda ta un Reino constitucional. E Constitucion (Grondwet) ta determina cu gobierno lesa e ministronan ta responsabel pa e maneho gobernamental, y no e monarca mes. Lareina ta goza di un posicion di inmunidad.

Hulanda ta un democracia parlamentario. E estado ta wordo goberna pa un gobierno bao supervicion di Parlamento. E Gobierno ta consisti di Ministronan bao di liderato di e Ministro Presidente. Parlamento ta consisti di Prome y Segundo Camara.

[bw]E Segundo y Prome Camara

E 150 miembronan di e Segundo Camara ta wordo directamente eligi pa e ciudadanonan di Hulanda. Eleccionnan normalmente ta wordo teni cada cuatro aña. E tarea principal di e Segundo Camara ta pa supervisa e accionan di gobierno. E Segundo Camara tin algun poder pa haci esaki.

Un di e esunnan mas importante ta e derecho pa enmenda lesa e derecho pa cambia proyecto di lei propone dor di Gabinete. E Ministro responsabel pa e proposicion di e proyecto di lei lo por acepta un enmendemento asina, por pone esaki bao di votacion den e Segundo Camara of por rechasa esaki. Den e caso aki e Segundo Camara por presenta un mocion di desconfianza contra e Ministro o e Gabinete. Esaki finalmente lo por resulta den retiro di e Ministro of e Gabinete.

E Segundo Camara tambe por haci uso di su derecho di iniciativa, lesa e derecho di proposicion di proyecto di lei, e derecho di interpelacion lesa e derecho pa demanda clarificacion di e Ministro, e derecho di informacion y e derecho di presupuesto. E derechonan aki ta forma e base pa e Democracia parlamentario di Hulanda.

E 75 miembronan di e Prome Camara ta wordo elegi indirectamente.

Hulanda tin tres nivel di gobernacion: estado, provincianan y municipionan. Eleccion ta wordo teni cada cuatro aña pa e Conseho Provincial (e segundo nivel di gobernacion) y e municipionan. Diputadonan di e Conseho Provincial ta eligi e miembronan di e Prome Camara.

E Prome Camara ta un co-legislador y ta vigila maneho di gobierno. Tur proyecto di lei cu a wordo aproba den Segundo Camara mester wordo aproba tambe den e Prome Camara. E prome Camara por rechasa un proyecto di lei. E no por propone ni cambia proyecto di lei. Ademas, e miembronan di e Prome Camara tin e mesun derechonan cu e miembronan di e Segundo Camara.

[bw]Ministerionan

• Hulanda tin 13 Ministerio.
• Ministerio di Asunto General
• Ministerio di Asunto Externo y Cooperacion pa Desaroyo    
• Ministerio di Asunto Interno y Relacion den Reino    
• Ministerio di Justicia 
• Ministerio di Educacion, Cultura y Ciencia
• Ministerio di Finansas
• Ministerio di Salubridad, Bienestar Social y Deporte
• Ministerio di Defensa 
• Ministerio di Asunto Economico
• Ministerio di Vivienda, Planificacion Teritorial y Medio Ambiente
• Ministerio di Asunto Social y Labor
• Ministerio di Transporte, Trabaonan Publico y Maneho di Awa
• Ministerio di Agricultura, Recursonan Natural y Pesca

Na cabes di cada ministerio tin un ministro, cu ta carga responsabilidad politico pa e maneho di e ministerio concerni. Den e tarea aki e ta wordo sostene dor di uno o tin biaha dos secretario di estado.

E funcionarionan na cada Ministerio ta asisti e ministro y e secretario o secretarionan di estado den nan trabao. Nan ta mantene un posicion no partidario (principio di loyalidad). Despues di eleccion, e funcionarionan ta mantene nan funcion y ta continua nan trabao na e mesun ministerio pa e ministro o secretario di estado nombra resientemente.